الحياة المهنية

كيف تقوم الشركات بتعيين الموظفين

كيف تقوم الشركات بتعيين الموظفين

الناس اللى لسه بتدور على شغل عن طريق انها تبعت الـ CV بتاعها على 1000 ميل HR او تستنى اعلانات التوظيف على النت احب اقولهم انتوا بتضيعوا فرص كتير جدا منكم و البوست ده هيغير كتير من تفكيرك لانه هيشرحلك ازاى الشركات بتعين للوظائف المتاحة عندها وازاى معظمنا بيدور على شغل بالطريقة الخطأ ؟

الاغلبية العظمى مننا لما بييجى يدور على شغل بيقعد يدور على اعلانات الوظائف فى الجرائد ومواقع التوظيف وعلى ال Facebook بس 20% بس من الوظائف المتاحة فى الشركات هى اللى بيتعلن عنها اصلا فى الوسائل دى !!

الشركات عندها طرق مختلفة تملى بيها الوظائف الشاغرة عندها ومعظمنا ميعرفهاش او ميعرفش ازاى يستغلها ، الطرق دى :

  • اول حاجة بتفكر فيها الشركة لما تحتاج تعين حد فى وظيفة متاحة هى مين من جوا الشركة نفسها ينفع يتنقل فى الوظيفة دى ويقوم بيها او يشيل شغلها جمب شغله وده اسمه التعيين الداخلى منهم فيهم يعني.
  • ثانى طريقة لو مفيش حد جوا الشركة يقدر يتنقل او يشتغل الوظيفة دى يبتدوا يبلغوا الموظفين جوا الشركة لو حد فيهم يعرف حد كويس ومؤهل نقدر نجيبه على طول فى الوظيفة دى اختصارا للوقت اللى ممكن يضيع لو عملنا اعلان ونعمل مقابلات ووجع دماغ وفلوس ودى بيسموها Referrals او علاقات يعنى … والتطبيق الغلط ليها بيسمى “واسطة” وده معروف عندنا فى مصر جدا ، وهو إن حد يترشح وهو غير مؤهل للوظيفة بس بياخد أولوية اكرامية لمعرفته بشخص جوه الشركة.
  • ثالث طريقة انهم لو بردو ملقوش حد كويس يبتدوا يدوروا فى قاعدة البيانات بتاعتهم اللى مليانة C.Vs ويشوفوا مين قدم قبل كده وعندهم بياناته ويكلموه لو هو لسة مهتم بالشغل عندهم وبالوظيفة.
  • لو كل الطرق دى مجبتش حد كويس بيضطروا فى الاخر يعملوا اعلان توظيف وده بيحصل بس على %20 من الوظائف اما الباقى محدش بيعرف انه موجود اصلا ود مصطلح اسمه: The Hidden Job Market

بمعنى ان فى كم كبير جدا من الفرص والوظائف المتاحة موجود جوه الشركات بس بتطير قبل ما حضرتك تعرف انها موجودة اصلا عشان انت بس بتستنى اللى يجيلك فى اعلان وظيفة او اللى تلاقيه وقع قدامك بس !!

حاول تدور على شغل بطريقة مختلفة ومميزة لان الـ %20 اللى ظاهرين قدامك كل الناس بتتخانق عليهم مع ان فى %80 موجودين بس الشاطر هو اللى يعرف يوصلهم

اترك تعليقا